Mae Mike yn glyfar a golygus, yn athro coleg gyda thipyn mwy o garisma na’r darlithydd arferol, ffaith sy’n ei wneud yn boblogaidd iawn gyda’i fyfyrwyr - yn enwedig y merched. Nid yw’n syrpreis felly fod ei fyfyrwraig orau, Elen, yn datblygu teimladau tuag ato. Nid yw’n sioc chwaith fod Mike yn teimlo'r un fath - menyw ifanc hardd sydd mor ddeallus ag yntau. Mae eu perthynas yn rymus, y sbarc rhyngddyn nhw'n nerthol, a chyn hir mae Mike yn gadael ei wraig i fod gyda hi. Mae Elen yn darganfod byd newydd wedi iddi raddio ac eisiau profi popeth, tra bod Mike mor gyffrous am eu cariad newydd nes ei fod eisiau setlo lawr cyn gynted â phosibl. Mae hyn yn achosi ffraeo rhyngddyn nhw ambell waith ac yn y pendraw mae Elen yn ei adael, gan dorri ei galon.